RSS Feed (xml)
انا المصرى
الغريب يا مصر عن ارضك
وانا فيها بناديلك
انا الشمعه ال بتنور ف قنديلك
انا القنديل
ينور ليكى لياليكى واتاريكى
عايزه تدفنيه ف ليلك
انا دمعه بكاها الناس
واندفنت ف منديلك
انا نقطة عرق صافيه
فى عز الشمس شقت ف الوجود نيلك
انا طيفك
انا اسمك وتعريفك
انا ورقه بختم النسر
منسيه فى ارشيفك
انا صوره ف ضمير قلبك
فى عقلك او ف تخريفك
انا اللى عشت طول عمرى فدا عمرك
وجاتلى الضربه من سيفك
وبردو صبرت وتحملت
وقولت يا مصر على كيفك
انا طينك
انا عماكى ونور عينك
انا حلم اتولد فرحان
وشاب مصلوب على جبينك
انا طير انجرح تعبان
بموت م النوح ف زنازينك
بصدق غنوة الكداب
عن الامل اللى دقدق على الابواب
عارفه ليه بصدقها ؟؟
عشان تأليفك وتلحينك
انا سيمك
انا جهلك وتعليمك
وانا يا مصر لو تدرى
انا هددك وترميمك
وكلمة حق لم خافت من الظلمه
وهى مشنوقه ف الضلمه على نيلك
انا توبك
انا قدرك ومكتوبك
وانا الخطوه ال بتدبدب على دروبك
انا ابنك
اللى غزلك برجل حمار
وعاش محتار
لجل يلبى مطلوبك
وجه يجرى على حضنك لقى غيره
بيجرى وراه لجل يحدفه بطوبك
انا مش عارف اعمل ايه
عشان يا مصر ارضيكى
ومش عايز يا مصر ف يوم
ارحل عن اراضيكى
ومش عايز عشان ما اتهان
يكون بزبورى امريكى
انا عايز
اكون انسان يعيش فيكى
يموت فيكى
انا عمرى ما كنت جبان
يعنى اقدر احميكى
انا انسان
ومش خوان
يعنى مش راح أأذيكى
انا ابنك
عارفه يعنى ايه ابنك
ولا المعنى تاه منك
ولا ايه جرا ليكى ؟؟